Fyrsta ljóðabók Önnu Láru
Anna Lára Möller (f. 1966) hefur sent frá sér sína fyrstu ljóðabók sem ber titilinn VONIN.
Í bókinni er að finna bæði ljóð og örsögur og skiptist hún í 6 kafla sem nefnast: Sorgin, Leiftursókn, Farsæld, Í Fréttum er þetta helst ..., Örsögur og Vonin.
Ljóð Önnu Láru leika gjarnan á mörkum sorgar og gleði; þau lýsa sárri andlegri lífsreynslu, ást, þrá, tælingu, missi og örvæntingu.
Í örsögunum bregður höfundur á leik í fjölbreytilegum sögum þar sem greina má bæði háð og skop, en einnig ljóðrænar stemmningar og ádeilu.
VONIN er tileinkuð minningunni um eiginmann Önnu Láru, Jóhann Möller, sem lést á vormánuðum 2018. Bókin fæst í öllum helstu bókabúðum og má kaupa á netsíðum Forlagsins og Pennans-Eymundsson. Höfundarlaun af bókinni munu renna óskipt til hjartadeildar Landspítala.
Í kaflanum Í fréttum er þetta helst ... er að finna þetta ljóð:
Feigðarflótti
Ég flýt ekki á fleka á Miðjarðarhafi
ég bý í fínu húsi í forréttindalandi
ég á ekki barn sem drukknaði í flæðarmáli
undan ströndum Túnis í dag
ég á barn sem leikur sér úti
og býr við forskot í lífi og lifir í táli
Angi með andlit ofan í strandarsandi
endar sitt líf í ókunnu landi
Við augnabliks áhorf á fréttir
súpum við hveljur
hryllum okkur yfir veröldinni
og snúum okkur að öðru