Soffía Auður Birgisdóttir∙12. nóvember 2019
Ný ljóðabók Þórdísar
Þórdís Gísladóttir sendir nú í ár frá sér fimmtu ljóðabókina sína, MISLÆG GATNAMÓT. Áður hefur hún gefið út ljóðabækurnar Leyndarmál annarra (2010), Velúr (2014), Tilfinningarök (2015) og Óvissustig (2016). Í Mislægum gatnamótum heldur Þórdís áfram að rýna í íslenskt hversdagslíf - sem er hennar aðalsmerki - auk þess að velta fyrir sér orðum og fyrirbærum. Fyrsta ljóðið í bókinni heitir:
KUML
Ég hef lesið mér til,
haft samband við sérfræðinga,
rannsakendur kumla og haugfjár,
þeir segja grjótið ekkert gefa til kynna,
kannast ekki við neina dys.
En ég heyri hvískur úr jörðu
og veit að grápöddur smjúga
milli beina og amboða.
Fólk sannfærist ekki
fyrr en blæs ofan af holtinu
og blikar á hníf.