Steinunn Inga Óttarsdóttir∙ 3. ágúst 2019
Sólin rennur roða vafin
Elín Vigfúsdóttir frá Laxamýri í S-Þingeyjarsýslu (d. 1986) var aldeilis hagmælt og bragvís. Hún sendi frá sér eina ljóðabók um ævina og var þá orðin fullorðin.
Hér er dæmi um kvæðasnilli hennar:
Frjálsa vor
Frjálst er yfir fósturlandi
frítt til hafs að sjá.
Sólin rennur roðavafin
regindjúpin á.
Allt er orðið ungt að nýju
ilmar hlíð og grund.
Fjöllin standa fáguð roða
fá vart næturblund.
Borgin iðar öll af lífi
allir þráðu vor.
Allir vilja eitthvað vinna,
eitthvert marka spor.
Vorið gleður, vonir rætast
- vekur sofinn lýð.
Nú skal lesa letrið bjarta
ljúfa sólskinstíð.
Þar sem sorgin sat að völdum
sást vart gleðiljós
- vorið hefur aftur yljað,
aftur grætt þar rós.
Frjálst er yfir fósturlandi
frítt til hafs að sjá.
Sólin rennur roða vafin
regindjúpin á.