Pantheon I – Þórunn Jarla Valdimarsdóttir
Að þessu sinni frumbirtir Skáld.is ljóð eftir Þórunni Jörlu Valdimarsdóttur en það mun birtast í ljóðabókinni Villimaður í París sem kemur út um páskaleytið. Þórunn tileinkar ljóðabókina eiginmanni sínum heitnum, Eggerti Þór Bernharðssyni, sem lést í árslok 2014. Ljóðunum fylgja ýmist ljósmyndir eftir Eggert eða teikningar eftir Þórunni. Ljósmyndina af þeim hjónum tók Ásgeir Ebeneser.
Þórunn á langan ritferil að baki og hefur sent frá sér skáldsögur, ljóðabækur, ævisögur og sagnfræðirit auk fjölda greina og þátta fyrir bæði útvarp og sjónvarp. Frekari upplýsingar um Þórunni má finna í Skáldatalinu.
Pantheon
I
við gengum þreytt
svöng og þyrst
að hofi allra goða
draghölt
eftir dagsrölt
og sáum
yfir súlunum:
Aux grands hommes
la patrie reconnaissante [1]
hof stóru hommanna!
sagðir þú
hlógum
villimannlega
enda bannað að hlæja
að hommum
og stórmennum
hlógum brjálæðislega
hlógum dauðann til okkar
föðmuðum hann
því við höfðum skilað pundi
dal, krónu, franka
þrjátíu bókum og tveimur sonum
hlógum líf okkar
í sátt
elskan mín
ég þarf ekki að sjá þig eldast
og þú ekki mig
það er svo gott
þú ætíð ungur
ég þér alltaf ung
okkar band
ber vor, sumar, haustliti
---------
[1] Hús þekktra mikilmenna föðurlandsins.
