Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Margrét Sigríður Einarsdóttir var fædd 14. október 1893 í Hlöðutúni í Stafholtstungum í Mýrasýslu, dóttir hjónanna Einars Hjálmssonar og Málfríðar Kristjönu Björnsdóttur, ljósmóður.

 

Sigríður, eins og hún var jafnan kölluð, ólst upp í Munaðarnesi til sex ára aldurs (eldri systir Málfríðar Einarsdóttur. Eftir að hún missti móður sína fór hún í fóstur á Hvítárbakka. Á unglingsárum þráði hún að menntast og hafði gert ráðstafanir til að komast í Kvennaskólann, en ekki varð af því. Ráðskona var hún hjá föður sínum í Munaðarnesi frá 16 ára aldri til tvítugs. Hún vann fyrir sér sem sýsluskrifari en um 1920 kom hún til Reykjavíkur og hóf störf á Póstmálaskrifstofu.


Árið 1921 fór hún til Þýskalands og stundaði þar nám og ritstörf. Síðan sneri hún aftur í Borgarnes og vann við skrifstofustörf, orti ljóð og skrifaði dagbækur. Síðsumars 1925 starfaði hún við kjólasaum í Magasin du Nord í Kaupmannahöfn.

 

Árið 1926 kom hún aftur í Borgarnes og vann í sparisjóðnum, uns henni var sagt upp af stjórnmálaástæðum. Þá flutti hún til Reykjavíkur og setti upp saumastofu 1932. Þá kynntist hún Karli Ísfeld og eignuðust þau saman einn son sem var látinn heita Einar Ísaldur. Síðustu 15 æviárin var hún gæslukona í Þjóðminjasafni Íslands.

 

Fyrstu ljóðabók hennar, Kveður í runni, sem út kom 1930 var ekki sérlega vel tekið. Fékk hún engin ritlaun fyrir hana þótt bókin hafi selst upp í búðum. Næsta ljóðabók Sigríðar kom út rúmum tveimur áratugum síðar.

 

Hún þýddi skáldsögurnar Ljós í myrkrinu eftir Michel de Castillo (útg. 1966) og Hellarnir á tunglinu eftir Patrick Moore (1970). Þá lauk hún við þýðinguna á síðasta kafla finnsku goðsagnaljóðanna Kalevala, útg. 1962, en Karl Ísfeld hafði þýtt mestallt verkið.

 

Sigríður átti ljóð í ýmsum safnritum, m.a. í Borgfirskum ljóðum, 1947, Pennaslóðum, 1950, Svo frjáls vertu móðir, 1954, þrjú ljóð í Íslenskum ljóðum 1954-1963 (1972), tíu í Íslenskum ljóðum 1964-1973 (1976), tvö (Löng nótt; Í leit) í Íslenzku ljóðasafni AB (1977) og tíu ljóð í Stúlku, 1997. Þá átti hún bæði ljóð og smásögur í ýmsum tímaritum, þ.á m. Sólhvörfum og 19. júní.


Sigríður Einars frá Munaðarnesi lézt á 80. aldursári í Reykjavík, 10. júlí 1973.

 

 

Heimildir

Helga Kress 2006. En ég er hér ef einhver til mín spyrði. Borgfirskar skáldkonur í íslenskri bókmenntahefð. Borgfirðingabók

Samantekt Jóns Vals Jenssonar á gardur.is, stytt

 

Mynd af Sigríði er á vefnum myndlist.is

 

 

Sigríður Einars frá Munaðarnesi

    • 1971 Í svölu rjóðri
    • 1970 Laufþytur
    • 1956 Milli lækjar og ár 
    • 1930 Kveður í runni