Kristín Ragna Gunnarsdóttir fæddist í Reykjavík árið 1968. Hún lærði grafíska hönnun við Myndlista- og handíðaskóla Íslands og er með BA-próf í almennri bókmenntafræði og ritlist og MA-próf í ritlist frá Háskóla Íslands. Kristín Ragna hefur skrifað sjö bækur fyrir börn og nokkrar greinar um barnabækur í TMM og tímaritið Börn og menning. Auk þess hefur hún myndskreytt ótal bækur og hannað bókatengda myndrefla (njalurefill.is), frímerki og sýningar.
 
Kristín Ragna hefur hlotið Dimmalimm - íslensku myndskreytiverðlaunin í tvígang og myndabókin Örlög guðanna sem Kristín vann með Ingunni Ásdísardóttur var tilnefnd til Íslensku bókmenntaverðlaunanna árið 2008. Bók Kristínar Rögnu Úlfur og Edda: Dýrgripurinn var tilnefnd til Fjöruverðlaunanna og Barna- og unglingabókmenntaverðlauna Norðurlandaráðs 2017. Sjálfstætt framhald af þeirri bók Úlfur og Edda: Drekaaugun kom út nýverið hjá Bókabeitunni.
 
Kristín Ragna er félagi í Rithöfundasambandi Íslands, hún situr í stjórn SÍUNG og er varaformaður IBBY á Íslandi.