SKÁLD.IS

Júlíana Jónsdóttir fæddist 27. mars 1838 á Búrfelli í Hálsasveit. Hún ólst upp hjá föðurafa sínum og konu hans á Rauðsgili í Reykholtsdal. Eftir að hafa unnið víða á bæjum í Borgarfirði frá unga aldri flytur hún um tvítugt í Akureyjar á Breiðafirði og var þar vinnukona í 14 ár hjá sr. Friðrik Eggertz. Úr Akureyjum flytur hún í Stykkishólm, þar sem hún vann fyrir sér með ýmsum störfum. Um 1885 flytur Júlíana síðan til Vesturheims. Fyrst dvelur hún í Norður-Dakóta og Winnipeg en flytur síðan í nágrenni Seattle. Vann hún fyrir sér með heimilishjálp og barnapössun. Síðasta ár ævinnar bjó hún á heimili íslenskra hjóna í Blaine. Júlíana lést 12. júní 1917, ógift og barnlaus.

Eftir Júlíönu komu út tvær ljóðabækur. Sú fyrri hét einfaldlega Stúlka og gaf Júlíana hana út sjálf á Akureyri árið 1876. Mun sú bók hafa verið fyrsta ljóðabókin sem gefin var út eftir konu á Íslandi. Seinni bókin fékk nafnið Hagalagðar og var gefin út í Winnipeg árið 1916. Eftir Júlíönu liggur einnig leikritið Víg Kjartans Ólafssonar í handriti. Það var sviðsett í Stykkishólmi veturinn 1879 og lék Júlína sjálf aðalhlutverkið, Guðrúnu Ósvífursdóttur.

Heimildir og frekari upplýsingar má finna á eftirfarandi vefsíðum:

• Vefsíða Héraðsskjalasafns Skagfirðinga, sjá hér.
• Vefsíða Dalabyggðar, sjá hér. 
• Vefsíðan Lestu.is, sjá hér.