Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Ingibjörg Jónsdóttir fæddist í Reykjavík 14. nóvember 1933. Hún var dóttir hjónanna Jóns Sveinssonar útgerðarmanns og konu hans Magneu Jóhönnu Magnúsdóttur.

 

Ingibjörg vakti sem ungur námsmaður athygli fyrir fljúgandi greind, afbragðs námshæfileika og snögg tilsvör. Hún lauk stúdentsprófi frá Menntaskólanum í Reykjavík vorið 1953.

 

Haustið 1953 giftist Ingibjörg unnusta sínum, Ingva Matthíasi Árnasyni, syni Árna Kristjánssonar píanóleikara og Önnu Steingrímsdóttur. Fyrsta heimili þeirra var á Reynimel í húsi foreldra Ingibjargar. Ingvi og Ingibjörg voru samstúdentar úr MR. Var mikið jafnræði með þeim, bæði stórglæsileg, vel gefin og miklir námsmenn. Þau eignuðust fjóra syni og tvær dætur en urðu fyrir þeim harmi að missa tvo syni árið 1980 og voru þeir báðir á þrítugsaldri.

 

Auk heimilisstarfa og barnauppeldis vann Ingibjörg sem blaðamaður og við þýðingar og ritstörf, prjónaði og saumaði á börnin og varð síðar mikilvirkur rithöfundur. Ekki vildi Ingibjörg gera mikið úr eigin ritstörfum hún kallaði bækur sínar „steinsteypulitteratúr“ í blaðaviðtali og átti þar við að hún hefði skrifað þær til að auka tekjur heimilisins en þau hjón voru þá einmitt að byggja sér íbúð. Ingibjörg dó á jóladagsmorgun, 25. desember árið 1986.

 

Fyrstu bækur Ingibjargar voru ástarsögur en fljótlega fór hún einnig að skrifa myndskreyttar barnabækur. Barnasaga hennar Músabörn í geimflugi var færð í búning söngleiks sem settur var upp í Þjóðleikhúsinu undir nafninu Ferðin til Limbó árið 1964. Var það fyrsta leikritið sem Þjóðleikhúsið setti upp eftir íslenska konu. Eftir 1970 fékkst Ingibjörg að mestu við þýðingar á ástarsögum og spennusögum, meðal annars eftir þýddi hún bækur eftir Vivien Stuart og George G. Gilman. Þá þýddi hún fyrstu þrjátíu bækurnar um Ísfólkið eftir Margit Sandemo, sem og söguna Gvendur bóndi á Svínafelli eftir J.R.R. Tolkien sem kom út árið 1979

 

Heimild: Minningargrein eftir Charlottu Maríu Hjaltadóttur í Morgunblaðinu, 9. janúar 1987.

Ingibjörg Jónsdóttir

    • 1982    Endurfundir
    • 1973    Á ókunnum slóðum
    • 1971    Konurnar pukruðu og hvísluðust á
    • 1971    Einkaritari forstjórans
    • 1967    Einum vann ég eiða
    • 1966    Strákar eru og verða strákar
    • 1966    Hellir hinna dauðu
    • 1966    Sagan af Bra-Bra (Ragnar Lár myndskreytti)
    • 1965    Jóa Gunna: ævintýri litlu brúnu bjöllunnar (Oddur Björnsson myndskreytti)
    • 1965    Þrír pörupiltar (leikrit)
    • 1964    Systurnar
    • 1963    Músabörn í geimflugi (Þórdís Tryggvadóttir myndskreytti)
    • 1963    Ást til sölu
    • 1962    Ást í myrkri
    • 1961    Máttur ástarinnar