Hlín Agnarsdóttir leikskáld og rithöfundur  er fædd  í Reykjavík 1953. Hlín er fjölmenntuð í leiklistar- og bókmenntafræðum, hefur post-graduate gráðu í leikstjórn frá Drama Studio í Lundúnum, fil.kand-próf í leiklistarfræðum frá Stokkhólmsháskóla og MA-próf í almennri bókmenntafræði frá Háskóla Íslands.

Hlín  hefur gefið út þrjár bækur, tvær skáldsögur og eina sjálfsævisögulega bók sem var m.a. tilnefnd til Íslensku bókmenntaverðlaunanna í flokki Fræðirita og bóka almenns eðlis.

Hlín hefur einnig skrifað leikrit fyrir leiksvið, útvarp og sjónvarp, m.a. toilettedramað Konur skelfa sem sýnt var við metaðsókn í Borgarleikhúsinu, og komið að öðrum handritaskrifum fyrir sjónvarp og aðra miðla.

Hún hefur leikstýrt í öllum helstu leikhúsum landsins, m.a. hjá Leikfélagi Akureyrar, Leikfélagi Reykjavíkur og í Þjóðleikhúsinu. Hlín þýddi og leikstýrði Hræðileg hamingja eftir Lars Norén hjá Alþýðuleikhúsinu og síðar þýddi hún Laufin í Toscana fyrir Þjóðleikhúsið eftir sama höfund.
 
Hlín skrifaði Láttu ekki deigan síga (ásamt Eddu Björgvinsdóttur) sem sýnt var í Stúdentaleikhúsinu. Önnur verk sem hún hefur skrifað og jafnframt leikstýrt eru: Karlar óskast í kór, Alheimsferðir Erna og Gallerí Njála. Sokkabandið sýndi verk hennar Faðir vor í Iðnó 2004.

Á undanförnum árum hefur hún kennt ritlist og leiklist við Kvikmyndaskóla Íslands og Háskóla Íslands. Hlín hefur ennfremur starfað sem leikstjóri og dramatúrg og verið leiklistargagnrýnandi á DV og í Kastljósi á RÚV.

Heimasíða hennar er www.hlinagnars.is