Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Guðrún Hannesdóttir fæddist þann 18. júní árið 1944. Hún lauk stúdentsprófi frá MR árið 1964, nam listasögu við háskólann í Lundi frá 1968-70 og lauk BA-prófi í bókasafnsfræði frá Háskóla Íslands árið 1979. Guðrún hefur síðan starfað sem bókasafnsfræðingur og hefur nú umsjón með bókasafni Myndlistarskólans í Reykjavík.

 

Guðrún sendi frá sér bókina Gamlar vísur handa nýjum börnum árið 1994, en þar safnaði hún saman vísum fyrir börn og myndskreytti. Upp frá því hefur hún unnið við ritstörf og myndskreytingar eigin bóka fyrir börn meðfram bókasafnsstarfinu. Hún hefur einnig safnað alþýðukveðskap úr skriflegri og munnlegri geymd og birt í þremur bókum, ritað ljóð og greinar í tímarit og gefið frá sér tvær ljóðabækur. Guðrún hefur auk þess sýnt myndir sínar á sam- og einkasýningum hér á landi og víða erlendis.

 

Guðrún sat lengi vel í stjórn samtakanna Barna og bóka, Íslandsdeildar IBBY-samtakanna, sem og í ritstjórn tímaritsins Börn og menning, sem samtökin gefa út. Hún hefur hlotið verðlaun fyrir bæði skrif sín og myndskreytingar, þá helst Íslensku barnabókaverðlaunin ásamt Sigrúnu Helgadóttur árið 1996 fyrir Risann þjófótta og skyrfjallið, sem Guðrún myndskreytti; og Ljóðstaf Jóns úr Vör árið 2007 fyrir ljóðið „Offors.“

 

Finna má umfjöllun um nokkur ljóð eftir Guðrúnu í grein Bergljótar Soffíu Kristjánsdóttur „Í landslagi allra lófa" sem birtist í  ritinu Hugraun. Nútímabókmenntir og hugræn fræði.

 

Guðrún er búsett í Reykjavík.

Guðrún Hannesdóttir

    • 2018 Þessa heims 
    • 2016 Skin
    • 2015 Humátt
    • 2014 Slitur úr orðabók fugla
    • 2012 Teikn
    • 2010 Staðir
    • 2007 Fléttur
    • 2006 Gormur: saga um tólf litla ánamaðka
    • 2003 Hvar?
    • 2001 Einhyrningurinn
    • 2001 Sagan um Pomperipossu með langa nefið
    • 1998 Kerlingin vill hafa nokkuð fyrir snúð sinn
    • 1997 Sagan af skessunni sem leiddist

     

    Guðrún hefur einnig safnað saman gömlum vísum á bók, skrifað greinar og fengið birt eftir sig ljóð, bæði frumsamin og þýdd, í ýmsum tímaritum.

    • 2007 – Ljóðstafur Jóns úr Vör: „Offors“.
    • 2004 – Ljóðstafur Jóns úr Vör, sérstök viðurkenning: „Þar“.
    • 1998 – Heiðurslisti IBBY-samtakanna á alþjóðaráðstefnu í Dehli: Risinn þjófótti og skyrfjallið.
    • 1996 – Íslensku barnabókaverðlaunin: Risinn þjófótti og skyrfjallið.
    • 1994 – Viðurkenning Íslandsdeildar IBBY-samtakanna: Gamlar vísur handa nýjum börnum.

     

    Tilnefningar

    • 2016 - Fjöruverðlaunin: Humátt