Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Berglind Gunnarsdóttir er fædd í Reykjavík 1953. Foreldrar hennar voru Þórunn Eva Eiðsdóttir og Gunnar Aðalsteinn Magnússon og er Berglind yngst fimm systkina. Berglind tók stúdentspróf frá Verslunarskóla Íslands. Hún lagði stund á spænsku og málvísindi við Háskóla Íslands og Universidad de Complutense í Madrid.

 

Berglind hefur birt frumort ljóð og ljóðaþýðingar, einkum úr spænsku, bæði í eigin bókum og ýmsum tímaritum og safnverkum. Þá hefur hún einnig birt greinar um bókmenntir í blöðum og tímaritum og unnið við þáttagerð fyrir útvarp.

 

Berglind gaf út fyrstu ljóðabók sína 1983 og hefur alls sent frá sér sjö ljóðabækur og tvær skáldsögur. Þá hefur hún ritað ævisögu Sveinbjörns Beinteinssonar allsherjargoða og skrifað sagnfræðirit um arabíska menningu á miðöldum.

 

Berglind er ötull ljóðaþýðandi og hefur birt ljóð og ljóðaþýðingar í tímaritum á borð við Tímarit Máls og menningar, Són, Tening, Ljóðorm, Ský og Andvara, sem og í tímariti Nýlistasafnsins, The End. Þýðingar á ljóðum hennar hafa birst í þýska tímaritinu Horen: Wortlaut Island (2000) og í ljóðasafninu Am Meer und anderswo, 2015. Einnig á frönsku í ritinu 25 poetes islandais d‘aujourd‘ui (2004). Það ljóðasafn hefur líka verið gefið út á arabísku (2018).

 

Ljóð Berglindar hafa birst á sýningum, hún átti ljóð á sýningunni Íslands þúsund ljóð í Safnahúsinu 2000; árið 2006 sýndi hún ljóð á sýningu þriggja listforma í Listasafni Sigurjóns Ólafssonar, undir yfirskriftinni Út á skýjateppið: draumsæi og náttúrufar þriggja  forma. Þar voru til sýnis tré- og koparverk Sigurjóns og textílverk Helgu Pálínu Brynjólfsdóttur, auk ljóða Berglindar. Ljóð eftir hana birtist einnig á ljóðavef Jónasar Hallgrímssonar, náttúruljóð, 2007.

 

Minningarljóð Berglindar,  „Rúnar Gunnarsson (in memoriam),“ við lag Bubba Morthens var flutt af GCD, 1991. Ljóðið samdi hún í minningu bróður síns, Rúnars Gunnarssonar (1947-1972), lagasmiðs og söngvara. Á 20 ára afmæli Örlagsins, 2006, var gefinn út geisladiskur Kjartans Árnasonar, Allt sem var gleymt er munað á ný og þar var ljóð eftir Berglindi.  Þá átti hún ljóð í kvikmynd Nýja bíós, Brotabrot (1999) og í afmælisritið Safnahúsið 1909-2009. Þjóðmenningarhúsið (2009), skrifaði hún kaflann „Salurinn“.

 

Berglind sat í ritnefnd Ljóðaárbókar (1988 og 1989), sem og tímaritsins Hendingar (1991).

 

Auk ritstarfanna hefur Berglind starfað við ýmis önnur störf, lengst af á Landsbókasafni Íslands, á árunum 1993-2014. Berglind býr í Reykjavík.

 

Nýjasta bók Berglindar fjallar um arabíska menningu á miðöldum, en hún einskorðaðist ekki við Arabíu, heldur hafði orðið til heilt heimsveldi íslam sem náði frá Indlandi og Kína í austri til Norður-Afríku og Spánar í vestri. Þar blómstraði mikil og merkileg menning sem auðgaði mjög lönd Evrópu í margar aldir. Í bókinni fjallar Berglind í stórum dráttum um þessa stórmerku sögu sem er ekki á almanna vitorði á Vesturlöndum.

 

Berglind Gunnarsdóttir

    • 2014    Arabísk menning á miðöldum og áhrif hennar á Vesturlönd
    • 2013    Ekki einhöm
    • 2008    Ljóðleg
    • 2007    Tímavillt (skáldsaga)
    • 1999    Ljóðvissa
    • 1992    Allsherjargoðinn (ævisaga)
    • 1992    Flugfiskur (skáldsaga)
    • 1990    Ljósbrot í skuggann
    • 1986    Ljóðsótt
    • 1983    Ljóð fyrir lífi