Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Auður Haralds er fædd 11. desember 1947. Hún hefur starfað sem blaðamaður, þýðandi, útvarpskona og pistlahöfundur og sinnt verslunar-, skrifstofu- og verksmiðjustörfum. Í skáldsögum sínum fjallar hún um kvennakúgun og hlutskipti lágstéttarkvenna og stíll hennar einkennist af íróníu, frumlegum myndhverfingum og sviðsetningum. Fjöldi greina eftir Auði um jafnréttis- og samfélagsmál hafa birst í fjölmiðlum. 

 

Fyrsta skáldsaga hennar, Hvunndagshetjan: þrjár öruggar aðferðir til að eignast óskilgetin börn, kom út árið 1979. Hún vakti mikla athygli og opnaði umræðu í samfélaginu um heimilisofbeldi og kvennakúgun. Hún fylgdi henni eftir með Læknamafíunni sem út kom 1980. Undir titilinum framan á bókarkápunni stendur ,,Lítil pen bók eftir Auði Haralds“ en þannig vísar Auður til þeirra niðrandi ummæla sem kvenrithöfundar fengu um skáldverk sín á þessum tíma. Hlustið þér á Mozart? kom út 1982; íronísk ádeilda á innantómt líf heimavinnandi húsmóður sem les formúlukenndar ástarsögur til að drepast ekki úr leiðindum. Auður skrifaði afar vinsælar barnabækur um prakkarann Elías sem byggðu á innslögum sem hún skrifaði ásamt Valdísi Óskarsdóttur fyrir Stundina okkar. Unglingabókin Baneitrað samband á Njálsgötunni (1985) varð einnig afar vinsæl og síðar var gerð leikgerð eftir henni sem sett var á svið í íslensku Óperunni og víðar. Árið 1987 kom svo út síðasta skáldsaga hennar til þessa, Ung, há, feig og ljóshærð, sem er póstmódernísk skopútgáfa á hinni hefðbundnu ástarsögu. Auður tilheyrir þeim hópi kvenrithöfunda sem hætti að skrifa á níunda áratugnum en kenningar um ástæður þess eru reifaðar t.d. í lokaritgerð Kolbrúnar Huldu Pétursdóttur frá 2014. Árið 2007 skrifaði Auður Litlu, rauðhærðu stúlkuna, barnabók með myndskreytingum eftir Vigdísi Hlíf Sigurðardóttur.

 

Auður bjó um skeið á Ítalíu en býr nú á Bergþórugötunni.

 

Heimildir:

Kolbrún Hulda Pétursdóttir. Húmor sem skjöldur. 2014

Í þættinum Bók vikunnar á rás eitt má heyra upplestur Auðar, brot úr viðtölum við hana o.fl.:

http://www.ruv.is/frett/hvunndagshetjan-audur-haralds

Mynd af Auði er fengin af vefnum Lifðu núna

 

 

Auður Haralds

    • 2007 Litla rauðhærða stúlkan
    • 1994 Aðdragandi (smásaga í Tundur dufl)
    • 1987 Ung, há, feig og ljóshærð
    • 1986 Elías, Magga og ræningjarnir
    • 1985 Elías kemur heim
    • 1985 Baneitrað samband á Njálsgötunni
    • 1985 Elías á fullri ferð
    • 1984 Elías í Kanada
    • 1983 Elías
    • 1982 Hlustið þér á Mozart?
    • 1980 Læknamafían. Lítil pen bók
    • 1979 Hvunndagshetjan: þrjár öruggar aðferðir til að eignast óskilgetin börn
  • 2010 Stígvélaði kötturinn, Hans og Gréta, Tumi þumall. Haninn, músin og litla rauða hænan

    1981 Dulin fortíð eftir Phyllis A. Whitney