Arndís Þórarinsdóttir

Arndís Þórarinsdóttir er fædd árið 1982 í Reykjavík, þar sem hún býr enn ásamt eiginmanni og tveimur börnum. 

 

Árið 2005 birtist fyrsta smásaga hennar, "Líf og önd", í Tímariti Máls og menningar og hefur hún síðan sent reglulega frá sér smásögur auk þess að skrifa í bæði dagblöð og tímarit.

 

Fyrsta skáldsaga Arndísar, Játningar mjólkurfernuskálds, kom út 2011. Þessi frásögn af fermingarstúlku sem fer út af sporinu hlaut mjög góðar viðtökur og var tilnefnd til Norrænu barnabókaverðlaunanna 2013.

 

Arndís hefur skrifað talsvert fyrir Námsgagnastofnun, þar á meðal stuttar skáldsögur fyrir mið- og unglingastig.

 

Haustið 2018 kom barnabókin Nærbuxnaverksmiðjan út, sem er fyndin og fjörmikil saga ætluð lesendum á yngri stigum grunnskóla. Ári síðar komu Nærbuxnanjósnararnir og var bókin tilnefnd til Íslensku bókmenntaverðlaunanna í flokki barna- og unglingabóka.

 

2020 sendi Arndís frá sér sína fyrstu ljóðabók, Innræti.

 

Þá hefur hún einnig fengist við þýðingar og ritstjórn.

 

Arndís er með BA gráðu í almennri bókmenntafræði frá Háskóla Íslands, MA gráðu í leikritun frá Goldsmiths College, University of London og MA gráðu í ritlist frá Háskóla Íslands.  Hún hefur starfað sem blaðamaður og gagnrýnandi og var deildarstjóri á Bókasafni í Kópavogs í rúm tíu ár áður en hún sneri sér alfarið að ritstörfum.

 

Arndís hefur stýrt fjölmörgum ritsmiðjum fyrir bæði börn og fullorðna. Þá hefur hún unnið mikið að félagsmálum tengdum barnabókmenntum og var formaður IBBY á Íslandi um árabil. Hún situr nú í stjórn Síung á íslandi, samtaka íslenskra barna- og unglingabókahöfunda.

 

Arndís hefur hlotið nokkrar viðurkenningar fyrir ritstörf og má þar helst nefna Nýræktarstyrk Bókmenntasjóðs árið 2011, tilnefningu til Norrænu barnabókmenntaverðlaunanna 2013 og  til Íslensku bókmenntaverðlaunanna 2019. Árið 2020 hlaut hún Barnabókaverðlaun Guðrúnar Helgadóttur ásamt Huldu Sigrúnu Bjarnadóttur.

Arndís Þórarinsdóttir

    • 2020   Innræti
    • 2020   Arfurinn
    • 2020   Blokkin á heimsenda (með Huldu Sigrúnu Bjarnadóttur)
    • 2019   Nærbuxnanjósnararnir
    • 2019   Galdraskólinn
    • 2018   Nærbuxnaverksmiðjan
    • 2015   Gleraugun hans Góa
    • 2013   Lyginni líkast
    • 2011   Játningar mjólkurfernuskálds

Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband