SKÁLD.IS

Konur skrifa um konur sem skrifa

Ólína Kjerúlf Þorvarðardóttir

Ólína Kjerúlf Þorvarðardóttir fæddist í Reykjavík 8. september 1958 og ólst upp í Hlíðunum.

Hún flutti 14 ára gömul með foreldrum sínum til Ísafjarðar og gekk í Menntaskólann á Ísafirði. Ólína lærði íslensku, þjóðfræði og heimspeki við Háskóla Íslands og lauk þaðan doktorsprófi árið 2000. Hún tók einnig stjórnunarnám og er með kennsluréttindi á framhaldsskólastigi. Ólína var um tíma búsett í Danmörku auk þess sem hún bjó á Ísafirði í samanlögð 16 ár. Hún býr nú Reykjavík með annað aðsetur á Bifröst.

Ólína er forseti Félagsvísindadeildar Háskólans á Bifröst. Áður hefur hún gegnt starfi skólameistara Menntaskólans á Ísafirði, forstöðumanns Þjóðháttadeildar Þjóðminjasafnsins og verið alþingismaður fyrir Norðvesturkjördæmi. Ólína  hefur einnig starfað sem blaða- og fréttamaður, ritstjóri, pistlahöfundur, dagskrárgerðarmaður við útvarp og sjónvarp, háskólakennari og bókmenntagagnrýnandi. Auk þess hefur hún gegnt störfum borgarfulltrúa í Reykjavík. Hún hefur um árabil verið virkur björgunarsveitarmaður og fararstjóri fyrir Ferðafélag Íslands.

Fyrstu ljóð Ólínu birtust í Lesbók Morgunblaðsins árið 1993 en síðan hafa ljóð hennar birst í ýmsum ritum. Árið 1995 hlaut hún verðlaun í ljóðasamkeppni Listahátíðar Reykjavíkur. Ljóð hennar eru ýmist laus eða hefðbundin í formi, en auk óháttbundinna ljóða hefur Ólína lengi fengist við vísnagerð og kveðskap. Hún er félagi í Kvæðamannafélaginu Iðunni, var varaformaður þess um tíma og formaður í Óðfræðifélaginu Boðn.

Ritsmíðar Ólínu eru á sviði fræða og skáldskapar. Þá hefur hún einnig fengist við þýðingar og samið kennsluefni, auk þess sem hún hefur haldið fjölmargra fyrirlestra og skrifað tímaritsgreinar.

 


Ritaskrá

  • 2021  Ilmreyr. Móðurminning
  • 2020  Spegill fyrir Skugga baldur
  • 2019  Lífgrös og leyndir dómar – Lækningar, töfrar og trú í sögulegu ljósi
  • 2017  Við Djúpið blátt. Byggð mannlíf og saga við Ísafjarðardjúp. Árbók Ferðafélags Íslands
  • 2007  Vestanvindur – ljóð og lausir endar
  • 2000  Brennuöldin. Galdur og galdratrú í málskjölum og munnmælum
  • 1995  Álfar og tröll
  • 1988  Bryndís. Lífssaga Bryndísar Schram

 

Verðlaun og viðurkenningar

  • 1995  Verðlaun í ljóðasamkeppni Listahátíðar

 

Tilnefningar

  • 2019  Til Íslensku bókmenntaverðlaunanna fyrir Lífgrös og leyndir dómar – Lækningar, töfrar og trú í sögulegu ljósi