• Soffía Auður Birgisdóttir

Systu megin

Steinunn Sigurðardóttir hefur sent frá sér nýja bók sem ber titilinn Systu megin og undirtitilinn leiksaga.


Í kynningu Forlagsins segir:


Systu megin er hárbeitt og óvenjuleg saga um utangarðsfólk sem fær hér bæði rödd og ásýnd.


Systa býr ein í kjallarakompu við bágar aðstæður en hún ræður sér sjálf. Hún hefur losað sig að mestu undan ægivaldi Mömmu eins og Brósi, bróðir hennar og bandamaður í tilverunni. Saman hafa þau tekist á við harðan heim frá barnæsku en valið hvort sína leið, Brósi innan samfélagsins, Systa utan þess.


Dagsdaglega dregur Systa fram lífið með dósasöfnun en þegar henni býðst aukið öryggi í skiptum fyrir frelsi er úr vöndu að ráða.


Skáldverk Steinunnar Sigurðardóttur búa yfir einstökum tóni og andblæ. Sögur hennar eru í senn harmrænar og fyndnar, raunsæjar og furðulegar, og leikandi stíllinn er ærslafullur. Steinunn hefur skapað og skrifað um margar ógleymanlegar kvenpersónur í verkum sínum – svo aðeins Alda í Tímaþjófnum sé nefnd – og nú bætist Systa í hópinn.



Steinunn, sem er búsett í Frakklandi mestanpart ársins, er á landinu þessa dagana til að fagna útgáfu nýju bókarinnar og kynna hana. Hlýða má á viðtal Þrastar Helgasonar við Steinunni á rás 1 hér og horfa má á viðtal Sigmundar Ernis í þættinum Á mannamáli við hana á Hringbraut hér.


Fimmtudagskvöldið 28. október verður haldið höfundarkvöld með Steinunni í Gunnarshúsi, húsi Rithöfundasabandsins á Dyngjuvegi 8. Þar mun Björn Halldórsson eiga samtal við Steinunni um nýju bókina og eru allir velkomnir. Spjallið hefst kl. 20.