• Guðrún Steinþórsdóttir

Skáldkonur í Gunnarshúsi 9. desember


Á fimmtudaginn mæta skáldkonurnar Eva Rún Snorradóttir, Kristín Ómarsdóttir og Valgerður Ólafsdóttir í Gunnarshús, á Dyngjuvegi 8 í Reykjavík, og lesa upp úr nýútkomnum verkum sínum.


Bók Evu Rúnar heitir Óskilamunir og er smásagnasafn. Óskilamunir eru sögur um ástir sem finnast og tapast, hvernig sársauki mótar okkur, um allt það sem brotnar en ekki síst brotin sem enginn vitjar. Hvernig við leitum með veiku ljósi að leið í gegnum þetta ævarandi grímuball sem lífið er. Hversdagslegar og prívat sögur um lesbískar ástir.


Kristín kynnir og les upp úr bókinni Borg bróður míns, sem fjallar um hömlur og auðmýkt, kröfur og uppgjöf, sveigjanleika, orðleysi og vanmátt og veiklunda hugrekki, sögurnar gerast meira og minna í borg - sem má þekkja og ímynda sér - inn í minnstu einingum borgar: herbergjum og eldhúsum og stofum og í fjörum og kirkjugörðum og á víðavangi. Þetta er óbeint framhald Einu sinni sagna, sem samið var af tvölfalt yngri höfundi.


Valgerður er höfundur bókarnnar Konan hans Sverris sem segir frá persónunni Hildi sem er laus úr erfiðu hjónabandi en styrkur hennar eykst dag frá degi. Í sögunni lítur Hildur til baka og hugsar um mynstrin sem við lærum svo rækilega að á endanum vefjast þau um háls okkar eins og níðþungir hlekkir. Konan hans Sverris er saga um ofbeldi og eftirsjá en einnig um þrautseigju og sátt. Nú á dögunum birtist ritdómur um bókina hér á Skáld.is.


Viðburðurinn hefst kl. 20 og í boði eru piparkökur og mandarínur. Allir velkomnir meðan húsrúm leyfir.