Skáld nr 365

Mynd: Rúv

Skáld dagsins sem nú bætist í vort skáldatal, er Ásdís Jenna Ástráðsdóttir, sem síðar vildi láta tala um sig í karlskyni og tók sér nafnið Blær Ástráður Stefán. Skáldið lést í janúar sl. 51 árs að aldri og lét eftir sig eiginmann og ungan son. Ásdís Jenna var barnabarn og nafna Jennu Jensdóttur skáldkonu.

Árið 1990 sendi Ásdís / Blær frá sér einkar fallega og einlæga ljóðabók, þar sem m.a. er að finna þetta ljóð:

Að sigra

Stundum kemur örvæntingin til mín

eins og refsinorn

og öskrar í eyru mín:

Þú getur ekki gengið

þú getur ekki notað

hendur þínar

Þegar sorgin sker hjarta mitt

heyri ég hlýja rödd hvísla:

Hugur þinn skynjar heiminn

í sárustu sorg og dýpstu gleði.

Og ég finn kærleika umvefja mig

í nálægð vina minna

eins og stjörnur jóla

sem lýsa sáttfúsum augum okkar.

Og lífsgleði mín kemur á ný og sigrar.