• Jóna Guðbjörg Torfadóttir

Sírenurnar í Grænlandshafi


Ljóð dagsins heitir Sírenurnar í Grænlandshafi og er eftir Móheiði Hlíf Geirlaugsdóttur. Ljóðið birtist í ljóðabók skáldkonunnar, Gríseyjar, ósýnilegt landslag, sem kom út á síðasta ári í Pastel ritröðinni. Þetta er önnur ljóðabók Móheiðar en hún hefur fengist bæði við ljóðagerð og þýðingar.


Það er skemmtilegur húmor í neðangreindu ljóði Móheiðar en einnig eftirsjá að horfinni æsku og spennandi ævintýrum:




Sírenurnar í Grænlandshafi


Þær eru nokkrar eftir

sírenurnar


en sjómennirnir

láta ekki ginna sig lengur


kannski af því

að gyllta hárið

er orðið silfurgrátt


kannski af því

að brjóstin eru sigin


kannski út af öllum

aukakílóunum


eða af því þær eru hættar að syngja

með seiðandi röddum