• Jóna Guðbjörg Torfadóttir

Rétt viðbrögð...



Ljóð dagsins er eftir Sigurlínu Bjarneyju Gísladóttur sem birtist í Ljóðabréfi No 3 sem Tunglið forlag gaf út á árinu. Ljóðið á býsna vel við þessa dagana þegar allt leikur á reiðiskjálfi. Þá er nú jafn gott að vera með réttu viðbrögðin á hreinu!



Rétt viðbrögð við áfalli/veiru/

jarðskjálfta/eldgosi/ofbeldi/

nauðgun/lífshættu/árás


Hlaupa garga þegja

frjósa flýja frjósa flýja

slökkva á sér sofna vakna

öskra hrópa bölva dansa skríða

undir borð

uppá borð

halda í gluggakarma

sleikja rúðuna

brjóta spegilinn á baðinu

tæma ísskápinn

undir sæng

oná sæng

ríða fróa sér svo

gráta í koddann á húðina í grímuna


Sofna standandi slefa í koddann

þegja og fela sópa sópa sópa

fara í minipils síðpils minipils síðpils til skiptis

buxur stuttbuxur smekkbuxur nærbuxur

öskra bíta og slá þegja og klappa köttum


Drekka gos kaffi viskí og vatn

þurrka sig upp

byggja virkisveggi

brjóta veggi

fara í bað

setja kaffikorg í hárið og hlæja

hlæja mikið hlæja lítið hlæja ekkert og aldrei framar


vera á verði og gráta

vera ávalt viðbúin/nn og sofna

vökva blóm drepa flugur

faðma og hrinda faðma og hrinda

leggjast í hýði verða púpa

brjótast inn brjótast út

klippa vængi festa vængi

fljúga ljúga júga úga ga a


og vita skaltu vita skaltu að

öll öll öll öll öll ÖLL ÖLL ÖLL

viðbrögð eru rétt

sama hver þau eru

þá eru þau rétt

því þau eru þín

þú undurfagra strá

Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband