• Guðrún Steinþórsdóttir

Ný ungmennabók og stækkandi skáldatal

Á dögunum kom út fyrsta skáldsaga Þórunnar Rakelar Gylfadóttur; Akam, ég og Annika, sem gefin er út af Angústúru. Bókin er ætluð ungmennum en í kynningu hennar segir:



Hrafnhildur neyðist til að flytja til Þýskalands með fjölskyldu sinni þegar stjúpfaðir hennar fær þar vinnu. Nýi skólinn er mjög strangur og hún saknar pabba síns og ömmu, en aðallega bestu vinkonu sinnar. Þegar hún kynnist hinum krökkunum í skólanum renna hins vegar á hana tvær grímur. Vissulega er erfitt að vera nýja stelpan í bekknum, mállaus og vinalaus, en það virðist vera til verra hlutskipti. 
Hrafnhildur þarf á öllu sínu hugrekki að halda þegar hún tekst á við áskoranir sem hana hefði ekki einu sinni grunað að væru til. Hverjum getur hún eiginlega treyst? Af hverju vill Annika endilega vera vinkona hennar og í hvaða vandræðum er Akam?

Í sögunni er tekist á við mikilvæg og alvarleg málefni meðal annars réttlæti, fordóma, hefndar- og hrelliklám.


Þórunn Rakel er menntaður sjúkraþjálfari og er einnig með meistarapróf í viðskiptafræði. Um þessar mundir stundar hún meistaranám í ritlist auk þess sem hún kennir í Hagaskóla. Það er alltaf gaman þegar nýjar raddir kveða sér til hljóðs og óskum við Þórunni Rakel innilega til hamingju með bókina um leið og við bjóðum hana velkomna í Skáldatalið.