Ný bók frá doktor Steinunni!

Í gær var Steinunn Sigurðardóttir skáld sæmd heiðursdoktorsnafnbót frá Háskóla Íslands, ásamt Hannesi Péturssyni. Og í dag kom út ný ljóðabók hennar, Tíminn á leiðinni. Í kynningu Máls og menningar á bókinni segir:

Tíminn á leiðinni er ellefta ljóðabók höfuðskáldsins Steinunnar Sigurðar-dóttur. Meginstef hennar er tíminn sjálfur, ýmist gjöfull eða grimmur; kynslóðir sem koma og fara, árstíðir, upphaf og endalok – horft er bæði inn á við og út í heiminn, á náttúruna, lífið sjálft. Ljóðmálið er leikandi létt og hnitmiðað, myndir dregnar skýrum og oft óvæntum dráttum, kaldhæðni og djúp alvara vegast á í skörpum og kjarnmiklum ljóðum.

Auk ellefu ljóðabóka hefur Steinunn sent frá sér fjórtán skáldsögur, eina barnabók, tvö smásagnasöfn og tvær ævisögur, auk þess að skrifa sjónvarpsleikrit.

Í nýju ljóðabókinni er meðal annars að finna eftirfarandi ljóð:

FEMME FATALE

Ekkert stóðst henni snúning

ekki kirsublómaskýið,

ekki rósagarðurinn.

Ekkert fagurt dýr stóðst henni snúning,

engin höfuðskepna heldur.

Ekki fyrr en Vetur Konungur gómaði hana í skógarrjóðrinu,

þar sem blágrenitrén standa vörð allan hringinn.

Frysti hana frá toppi til táar, hina óviðjafnanlegu,

litla hattinn hennar líka

og stráði gullslegnum sólarsnjó

á ljósbláa silkikjólinn síða

á drúpandi eyrnalokkana úr lapis

þangað til aðeins varð eftir hvítagull.

Við dimmumót fóru þeir að tínast út úr skóginum,

haltrandi sumir, órakaðir, jafnvel timbraðir.

Aðrir vel á sig komnir og sléttir í framan.

Slógu hring um sína óhreyfanlegu, óviðjafnanlegu,

í skógarrjóðrinu.

Kyrja lágum bassaröddum tregans

um flöktandi augnaráð hennar í stiganum,

titrandi augnhárin,

óviðjafnanlegan nefbrodd

björtu bringuna

skæru röddina

sem hljómar ofar lækkandi bassaröddum

í yfirvofandi næturheiminum, með hundslappadrífu á köflum.

(Birt með leyfi útgefanda)

Skáld.is óskar Steinunni Sigurðardóttur hjartanlega til hamingju með doktorstitilinn og nýju bókina.