• Guðrún Steinþórsdóttir

Milli mín og heimsins

Árið 2015 sendi Alda Björk Valdimarsdóttir frá sér sína fyrstu ljóðabók, Við sem erum blind og nafnlaus. Bókin skiptist í fimm hluta en í þeim fyrsta, Farvegi táknanna, er að finna ljóðið „Milli mín og heimsins“ sem að þessu sinni er ljóð vikunnar.



Milli mín og heimsins

Ég horfi ávölum augum á það sem rúmast innan ferhyrningsins.


Samúðarfull græt ég yfir viðtalsþættinum í sjónvarpinu og bægi frá spurningum dóttur minnar.


Gráðug leita ég að upplýsingum á netinu og svara því ekki dyrabjöllunni


og ef ég þarfnast kyrrðar lít ég út um gluggann því að náttúran skiptir mig máli.


Ég ramma inn myndir af ástvinum


hamra þá á vegginn


og bækurnar sem ég les eru líka hornréttar.


Milli mín og heimsins eru rúðustrikaðar línur.


Væri ég orðin að ferningi þyrftum við aldrei að snertast


og á daginn myndir þú horfa á mig eins og á málverk í stofunni.