• Soffía Birgisdóttir

Mýld af siðmenningunni


Það þykir ekki pent

að tala um allt hið frumstæða

sem ryðst inn í siðmenntað líf okkar


Þannig hljómar upphafið að ljóðinu KÓSÝ í nýrri bók Arndísar Þórarinsdóttur, sem er jafnframt hennar fyrsta ljóðabók og ber titilinn Innræti.


Titilinn er einstaklega vel til fundinn því ljóðin fjalla flest á einn eða annan hátt um reynslu, tilfinningar og hugsanir kvenkyns ljóðmælanda sem opinberar innræti sitt og lætur stundum skína inn í kviku. Arndís yrkir um ýmislegt sem sjaldan er borið á borð fyrir aðra, því það "þykir ekki pent" eða á rætur í "frumstæðum" tilfinningum og hvötum. Ljóðmælandinn tjáir það sem við látum oftast ósagt eða er haldið tilbaka að reglum samfélagsins, heft eða mýlt "af siðmenningunni":


Mig langar að spangóla


Sökkva tönnunum í skínandi holdið

lita föla ásjónu hennar blóði


Mig langar að ýlfra

en geri það ekki


(úr ljóðinu EÐLIÐ)


Arndís sækir yrkisefni sitt ýmist til hversdagslegrar reynslu eða drauma, orðfærið er hnitmiðað og oftar en ekki merkt kaldhæðni og húmor, myndlíkingar notaðar sparlega. Engu að síður tekst henni oft að draga upp sterkar myndir, líkt og í ljóðinu NEÐANSJÁVAR:


Mér er sagt

að stærsta ókannaða ævintýri jarðarinnar

séu undirdjúpin


Langt fyrir neðan öldutoppana

eru dalir, fossar, fjöll

og framandi skepnur


Hafið sleikir barnstær

á sólgylltri strönd

sem við flugum fjögur þúsund kílómetra til þess að heimsækja

okkur til geðbótar í svartasta skammdeginu


Hafið sleikti barnstær þínar

og það nálgast


Mörg ljóðanna lýsa reynslu konu af ólíkum hlutverkum sínum, hún er móðir, þótt það sé henni kannski ekki eðlislægt, og eiginkona sem verður að standa sig á mörgum sviðum - og beitir til þess ýmsum ráðum:


Það er léttir að smokra sér í aðhaldskjólinn

Andardrátturinn verður grynnri

og þrýstingurinn hjálpar mér að muna

hvar skilin milli sjálfrar mín og heimsins liggja


(úr ljóðinu MORGUNSIÐIR SEM ÉG SEGI ENGUM FRÁ)


Þessi kona, sem er föst í taumhaldi siðmenningarinnar, þráir ef til vill að taka sér pláss, hegða sér illa og kunna ekki að skammast sín. Hún lætur þó ekki oft undan slíkum þrám þótt hún leyfi lesandanum að rannsaka innræti sitt og fari stundum yfir mörkin.


Innræti er athyglisverð ljóðabók sem enginn byrjendabragur er á - enda Arndís reyndur höfundur þótt bókin sé frumraun hennar á sviði ljóðlistar.



Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband