• Jóna Guðbjörg Torfadóttir

Ljóð dagsins: Hafnarvogin


Ljóð dagsins er Hafnarvogin eftir Brynju Hjálmsdóttur. Ljóðið birtist í Ljóðabréfi No 3 sem Tunglið forlag gaf út á árinu.


Brynja Hjálmsdóttir hefur sent frá sér eina ljóðabók, Okfrumuna, og hlaut hún afar góðar viðtökur. Bókin hlaut Bókmenntaverðlaun starfsfólks bókaverslana og var tilnefnd til bæði Fjöruverðlaunanna og Rauðu hrafnsfjaðrarinnar.





Hafnarvogin


Ekkert sleppur frá hafnarvoginni

i henni er allt vegið

og metið


Ekkert sleppur allt skal leggjast

á vogina


Bifreiðar, löngur og rauðmagar

gormadýnur, hjólbörur og dráttarvélar, spíttbátar

marbendlarnir blaðskellandi

af hlátri með þúfurnar tómar í fanginu

þeir verða líka að leggjast á vogina


Allir verða að taka sakramentið allir verða að vigtast

við viljum vita

hvað þeir eru dýrir því þyngra því dýrara

fiskurinn er dýr - samt eru vasar okkar tómir

alltaf syndir hann í gegnum fingur okkar hann er

sleipur


Þetta er eins konar lögmál

allt sem vogar sér í höfnina

er vegið

á hafnarvoginni


Sumt er metið að verðleikum

en flestu er hafnað