• Helga Jónsdóttir

Lát hvarma skýla


Ljóð vikunnar heitir „Lát hvarma skýla“ og er eftir Arnfríði Jónatansdóttur. Ljóðið birtist í bókinni Þröskuldur hússins er þjöl (1958) sem er fyrsta og eina ljóðabók Arnfríðar en hún var endurútgefin af Unu útgáfuhúsi árið 2019. Soffía Auður Birgisdóttir skrifar afar áhugaverðan inngang að þeirri útgáfu þar sem hún fjallar um yrkisefni Arnfríðar og einkenni ljóðanna auk þess sem hún víkur orðum að stöðu skáldkonunnar innan karllægrar bókmenntahefðar og þögninni sem hefur ríkt um ljóðlist hennar. Í lok bókarinnar má einnig lesa skemmtilegt viðtal Þórunnar Hrefnu Sigurðardóttur við Arnfríði frá árinu 2002 þar sem meðal annars er komið inn á stríðsótta sem greina má í bókinni en hann kemur bersýnilega fram í „Lát harma skýla“:



Lát hvarma skýla

augans hljóðu aðgát,

skugga óttans – barnið

blunda.


Syngi gullvín

sveiti viðarins

sólgleði

sáð tára

gullvín.


Amma hefur lokið

fiskbreiðslunni,

skjallahvíta fiskinn

þvoði og breiddi

til þerris á stein.

Amma hefur lokið

fiskbreiðslunni.


Blunda þú barnið

þeir eru naumast hættir að skjóta.


Reykurinn úr byssuhlaupunum

lyppast yfir hæðunum

yfir vötnunum –

eins og útfrymi.


Syngi

arður tára

sviði moldar

gleðisól

sof þú, barnið.


Amma breiðir snemma

fisk í þerri.