• Soffía Auður Birgisdóttir

Konur og læknar - í bókum og lífinu


Í nýútkomnu greinasafni Fléttur V: #MeToo er meðal annars að finna grein eftir bókmenntafræðinginn Guðrúnu Steinþórsdóttur sem nefnist "Kona fer til læknis". Þar fjallar Guðrún um ýmis vandkvæði í samskiptum kvenna og lækna, eða eins og segir í ágripi:


"Í greininni er fjallað um frásagnir af erfiðum samskiptum kvenna við heil-brigðiskerfið sem hafa reglulega komið fram jafnt á netinu, í blaðaviðtölum og í greinum en einnig í skáldsögum og ævisögum. Algengt þema í slíkum sögum er að konurnar sem segja þær mæti litlum skilningi, læknar hlusti ekki á þær, segi þeim að hreyfa sig meira og þar með grenna sig, greini veikindi þeirra skakkt og/eða finnist ekki þörf á að senda þær í frekari rannsóknir. Í greininni er rætt um sögur af þessu tagi, eðli þeirra og afleiðingar."

Guðrún vísar í bókmenntir eftir konur sem fjalla um samskipti sögupersóna við lækna, til að mynda Grandaveg 7 (1994) eftir Vigdísi Grímsdóttur, "þar sem sagt er frá ólíkum viðbrögðum hjóna við barnsmissi", og Læknamafíuna (1980) eftir Auði Haralds en í þeirri skáldsögu "segir frá þriggja barna einstæðri móður sem hefur sáran verk í síðunni og erfiðum samskiptum hennar við lækna sem meðal annars hlusta ekki á hana, greina veikindi hennar skakkt og hafa ekki áhuga á að senda hana í frekari rannsóknir". Önnur skáldsaga sem kemur upp í hugann og fjallar um erfið samskipti konu og lækna er Sólin og skugginn (1981) eftir Fríðu Á. Sigurðardóttur - og vafalaust má finna margar fleiri ef að er gáð.



Eins og getið er í neðanmáli í grein Guðrúnar hefur Svandís Svavarsdóttir heilbrigðisráðherra "ákveðið að láta kortleggja heilsufar landsmanna út frá kynja- og jafnréttissjónarmiðum og gera mat á því hvort heilbrigðisþjónustan taki mið af ólíkum þörfum kynjanna". Það eru góð tíðindi og tímabært að greina þennan vanda og uppræta hann.



Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband