• gus2605

Jólaleg ljóð

Í tilefni þess að fyrsti í aðventu er nú um helgina er upplagt að endurlesa Jólaljóðin eftir Kristínu Ómarsdóttur. 15 ár eru síðan bókin kom út en hún stendur alltaf fyrir sínu enda nokkuð ljóst að jólalegri ljóð eru vandfundin. Í bókinni má lesa ljóð um jólaköttinn, jólastjörnuna, jólakjólinn og snjókomu svo ekki sé minnst á að eitt ljóð er í laginu eins og jólatré og annað eins og jólabjalla. Bókin hefst á ljóði um jólasnjóinn en það er vel við hæfi að undirbúa sig fyrir aðventuna með því að lesa það.


Jólasnjór


Sumir kalla hann sykur.

Flórsykur jólasveinsins

er hann sigtar mjöllina

úr skýjunum niður á

kökuna.


Þá sjá íbúarnir sporin

að húsinu og sporin

frá húsinu.


Hver kom, hver fór.

Hver hvorki kom né fór.


Gaman að vera fyrst

til að spora út kökuna.