• Jóna Guðbjörg Torfadóttir

Haust eftir Kristínu Ómarsdóttur


Ljóð dagsins er Haust eftir Kristínu Ómarsdóttur. Það birtist í ljóðabókinni þerna á gömlu veitingahúsi sem kom út árið 1993 og nú aftur í ljóðasafni skáldkonunnar sem kom út á dögunum.






Haust


Laufin eru fallin og stólarnir eru dánir

það er komið haust


ég hringi svo oft í þig því það er komið haust


sendiferðabíllinn temur sér þolinmæði og

bíður fyrir utan gluggann

stundum horfumst við í augu

hann sýnir mér aldrei ónærgætni


auðvitað er bíllinn hvítur því það er komið haust


ég setti sum augnablikin í glösin hér

en sum augnablikin skildi ég eftir á förnum vegi

vonandi finnur þau einhver

en glösin fá að standa hér

eitthvað lengur


því það er komið haust


rek mig á það


komið haust


veit ekki hvernig mætti merkja það

með stjörnu eða krossi

exi

laufi

spurningarmerki

hvernig merkir maður haustið?


með þér

með mér?

með þér


merkimiði haustsins?


í hvaða líki: *+lauf?exis

?


exis


x


það er komið haust

ég mátti svosem vita það

sankallað haust með haustbragði

mátti vita það


hvað hafði ég svosem til máls míns?

hringdi aldrei í þig?


nei það er komið óumflýjanlegt

bráðlegt haust

sendiferðabíllinn opnar rösklega

á sér dyrnar og lítur við

glugga mínum


(Kristín Ómarsdóttir: Ljóðasafn, bls. 130-131)










Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband