• Jóna Guðbjörg Torfadóttir

Frumbirting ljóðs eftir Díönu Sjöfn


Að þessu sinni er ljóð dagsins Gári eftir Díönu Sjöfn Jóhannsdóttur en það hefur hvergi birst áður á prenti.


Auk þess að vera skáldkona er Díana Sjöfn bókmennta- og menningarfræðingur. Hún hefur sent frá sér tvö verk; ljóðabókina Freyju sem kom út árið 2018 og árið eftir kom út skáldsagan Ólyfjan. Það er því orðið tímabært að Díana Sjöfn sendi frá sér nýtt verk. Mögulega styttist í það því ljóðið Gári kemur beint úr ylvolgri smiðju skáldkonunnar og má ætla að fleira bíði þar birtingar.




Gári


Þau eiga

línustrikað líf

gárurnar liggja kannski undir

straujuðu dúkunum

Í sænska dekornum

Í þráðum egypsku bómullarinnar

raknar upp



þau sýna allt tipp topp

Í hólf og gólf

ekki spyrja að því

þetta snýst allt um skipulagið

um að skrifa í bók

línur

vel ígrundaðar línur og lista

setja allt upp í töflur og

Setja hluti ofan í ílát

úr plexígleri

hólfa

hluti sem eru í boxum

ofan í önnur box

sálina í ógegnsætt box

tilvistina upp í hillu

strjúka ítrekað af


strjúka



af