• Guðrún Steinþórsdóttir

Frásagnir og læknisfræði – spennandi fyrirlestur


Síðustu áratugi hefur spennandi rannsóknarsvið, læknahugvísindi, verið að ryðja sér til rúms en það er meðal annars sprottið upp af þörf læknanema til að læra um samskipti við sjúklinga og er því víða kennt í læknisfræði. Á Íslandi hafa læknahugvísindi verið kennd í læknadeild Háskóla Íslands í um áratug en læknirinn Bryndís Benediktsdóttir og bókmenntafræðingarnir Dagný Kristjánsdóttir og Ásdís Egilsdóttir eru brautryðjendur í því starfi. Í kennslunni eru bókmenntatextar notaðir til þess að auka skilning á aðstæðum sjúklinga og tilfinningum.



Árnastofnun fagnar í dag, 14. september, afmælisdegi dr. Sigurðar Nordals með svokölluðum Sigurðar Nordals fyrirlestri. Að þessu sinni mun Dagný Kristjánsdóttir flytja fyrirlesturinn Frásagnir og læknisfræði: Samstarf bókmennta og heilsugæslu í tilefni dagsins.


Í kynningu á vef Árnastofnunar segir:


Síðustu 30 árin hafa átt sér stað athyglisverðar umræður milli heilbrigðis- og hugvísinda um samskipti lækna og sjúklinga, um þekkingarfræði, mannskilning og framtíð heilsuvísindanna.

Fagsviðið „frásagnalæknisfræði“ (narrative medicine) hefur rutt sér víða til rúms um heim allan, sömuleiðis „heilsuhugvísindi“ (medical humanities) og ritlistarnámskeið (creative writing) fyrir lækna og annað heilsugæslufólk. Í Bandaríkjunum eru 55 háskóladeildir sem kenna þessi fræði en öflugastur er þó Columbíu háskóli í New York. Í Bretlandi og á öllum Norðurlöndunum eru frásagnalæknisfræði eða heilsuhugvísindi í boði í stærstu háskólunum í samvinnu hugvísinda- og læknadeilda.

Þessi fræðasvið eru býsna fjörmikil og tekist er á um markmið og leiðir innan þeirra. Fjölmargt heilsugæslufólk hefur fagnað aukinni umræðu, gagnrýni og nýjum viðhorfum en aðrir spyrja hvort hug- og læknavísindi ættu ekki bara að láta hvort annað í friði, þau séu ekki samstarfshæf af mörgum ástæðum. Birtingarmyndir þessarar umræðu eru þannig fjölbreytilegar og skoðanir margar. Í fyrirlestrinum verður reynt að gefa yfirlit yfir þetta áhugaverða svið.

Fyrirlesturinn er haldinn í Norræna húsinu og hefst kl. 17. Honum verður einnig streymt á vef Árnastofnunar.