Steinunn Inga Óttarsdóttir∙25. september 2020
Dýralíf Auðar Övu
Von er á nýrri skáldsögu eftir Auði Övu. Sú heitir Dýralíf og gerist í vetrarmyrkri, rétt fyrir jól, þegar áður óþekkt lægð er í aðsigi.
Á þriðju hæð við Ljósvallagötu býr ljósmóðir (en ekki hvað) í íbúð sem hún erfði eftir einhleypa og barnlausa ömmusystur sína. Upp úr bananakassa koma þrjú handrit sem ömmusystirin vann að um sína daga, Dýralíf sem er rannsókn á því sem mannskepnan er fær um, Sannleikurinn um ljósið og Tilviljunin.
Auður Ava hlaut íslensku bókmenntaverðlaunin 2016 og bókmenntaverðlaun Norðurlandaráðs 2018 fyrir skáldsöguna Ör og hin Médicis-verðlaunin frönsku fyrir Ungfrú Ísland sem kom út 2018.
Skáldsögur Auðar Övu hafa verið þýddar á 33 tungumál. Lesendur hafa beðið nýrrar skáldsögu með óþreyju.