• Steinunn Inga Óttarsdóttir

Að murka líf úr manneskju

Manneskjan

eftir Sigurbjörgu Þrastardóttur

Virðist fljótt

á litið ekki mikið

meir en safn af

stökkum beinum,

næfur

pappírsbarki

og hálfpottshjarta

sem má ekki við miklu

má ekki út úr húsi

í golu

(teygð glær húð)

en mér finnst

rétt að taka fram, að það er

talsvert verk

að murka lífið úr manneskju

(Hryggdýr 2018)

Sigurbjörg Þrastardóttir (f. 1973) hefur ort ljóð, skrifað skáldsögur og leikrit og verið tilnefnd til Bókmenntaverðlauna Norðurlandaráðs. Ljóð hennar og sögur hafa birst í þýðingum viða um heim, allt frá Frakklandi til Kólumbíu.

Ljóðabókin Hryggdýr frá 2018 er mögnuð, margræð og myndrík ljóðabók sem skáld.is mælir 100% með að njóta nú þegar haustið nálgast.