• Steinunn Inga Óttarsdóttir

Sólveig fær Blóðdropann

Sólveig Pálsdóttir hlýtur Blóðdropann fyrir skáldsögu sína, Fjötra.

Verðlaunin eru veitt árlega fyrir bestu íslensku glæpasögu ársins. Í ár voru 20 bækur tilnefndar.

Hið íslenska glæpafélag stendur að verðlaununum.

Fjötrar Sólveigar Pálsdóttur verða framlag Íslands til Glerlykilsins, norrænu glæpasagnaverðlaunanna 2021.

Í umsögn dómnefndar um verðlaunabókina segir:

„Niðurstaða dómnefndar er sú að Fjötrar eftir Sólveigu Pálsdóttur sé verðskuldaður sigurvegari að þessu sinni. Í sögunni fléttar Sólveig á frumlegan og öruggan hátt saman sögum af mannshvarfi, misnotkun og sjálfsskaða í spennandi frásögn sem litast af leyndarmálum fjölskyldna. Ljóst er frá fyrstu síðu að lesandi er í öruggum höndum höfundar sem hefur góð tök á öllum þráðum fléttunnar og hefur vandað til verks. Frásögn Sólveigar er í senn spennandi, áhugaverð, kímin og sorgleg. Afraksturinn er bók sem lætur engan ósnortinn.“

Dómnefnd skipuðu Páll Kristinn Pálsson, formaður, Helga Birgisdóttir og Kristján Atli Ragnarsson

Sólveig Pálsdóttir er fædd í Reykjavík 13. september 1959. Hún lauk leiklistarnámi 1982 og starfaði sem leikkona um árabil. Meðfram leiklistarstörfum vann hún að dagskrárgerð hjá RÚV. Sólveig hefur lokið námi í almennri bókmenntafræði og kennsluréttindum . Hún var íslensku, tjáningar- og leiklistarkennari við Hringsjá, náms- og starfsþjálfun í 17 ár og kenndi árum saman á vegum stofnana og fyrirtækja. Sólveig var útnefnd bæjarlistamaður Seltjarnarness 2019.