Jóna Guðbjörg Torfadóttir∙16. mars 2020
Grannkona eftir Steinunni Ásmundsdóttur
Ljóð dagsins ber titilinn Grannkona og er eftir Steinunni Ásmundsdóttur. Steinunn hefur sent frá sér ljóð, sögur og greinar en upplýsingar um verk hennar og ævi má nálgast í Skáldatalinu. Grannkona birtist í ljóðabókinni Í senn dropi og haf sem kom út í fyrra:
Grannkona
Gengur niður tröppurnar
með þvottinn sinn í körfu
hvítan sólhatt á höfði
og blærinn strýkur kjólfaldi
um granna ljósa kálfa
lökin blakta lengi á snúrum
því hún trítlar sporlétt
frá húsinu næsta dag
með bækur undir armi
og á erindi við fólk
meðan skýin hrannast upp
skiptir engu þó rigni í þvottinn
hann þornar aftur
hún treystir guði fyrir sínu.