• Steinunn Inga Óttarsdóttir

Hlekkur í ólánskeðju


Kveðið við mann

„Ekki get ég gert að því,

gremju til þó finni,

því stærsti hlekkur ert þú í

ólánskeðju minni.“

(19. júní 1959)

Þórhildur Sveinsdóttir sem orti þessa vísu fæddist 16. mars 1909 á Hóli í Svartárdal, Austur-Húnavatnssýslu. Foreldrar hennar voru hjónin Sveinn Jónsson og Vilborg Ólafsdóttir og forfeðurnir voru margir orðlagðir ljóðasmiðir. Þórhildur sendi frá sér tvær ljóðabækur, Í gær og í dag (1968) og Sól rann í hlíð, 1982 og er sú bók aukin og endurbætt frá þeirri fyrri. Æsku- og uppvaxtarárin liðu við venjuleg sveitastörf, „baðstofan var skólastofan, þar var lesið, kveðnar rímur, sagðar sögur, sungið og brugðið á leik og þar naut hagmælskan sín vel“ segir um hana í minningargrein í Morgunblaðinu.

Þórhildur er 294. skáldkonan sem bætist í skáldatalið frá upphafi hins góða framtaks hóps áhugasamra bókmenntafræðinga.

Skáldkonan orti lipurlega, m.a. þessa heilræðavísu:

„Ef þig vélar váleg frétt

vinsaðu úr af snilli.

Sumt er logið, sumt er rétt

og sumt er þar á milli.“

(Húnavaka, 1990)

Þórhildur lést í Reykjavík, 7. apríl 1990.

„Enginn frestur, ekkert dok,

er því ráð að lenda.

Nú eru komin leiðarlok,

langferðin á enda.“

(ÞS)

Engin mynd fannst af Þórhildi við vinnslu greinarinnar.

Meira um skáldkonuna, t.d.: https://www.huni.is/index.php?cid=13825&template=print.php.

Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband