Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Fyrsta leikrit eftir konu í Þjóðleikhúsinu

 

Fyrsta leikrit eftir íslenska konu sem sett var á svið í Þjóðleikhúsinu var söngleikurinn Ferðin til Limbó eftir Ingibjörgu Jónsdóttur (1933-1986). Leikritið var sýnt árið 1964 og fékk misjafna dóma.

 

Í Alþýðublaðinu, 12. janúar 1965  segir: Ferðin til Limbó er fjörmikið, litskrúðugt verk, mætavel lagað fyrir augu barnanna sem fylgdust með því af vakandi áhuga frá upphafi til enda...“. Síðan bætir gagnrýnandi við: „En þess er ekki að dyljast að Ferðin til Limbó er einkar efnisrýrt verk; sagan sem sögð er í leiknum barnagaman í einfaldasta myndasögustíl. Þar á móti er það Ingibjörgu Jónsdóttur til lofs og dýrðar að hún dregur enga dul á þetta og setur sig í engar lærimeistarastellingar yfir börnunum. Hún segir þeim sína einföldu sögu einföldum orðum.“

 

Loftur Guðmundsson segir um leikritið í pistli í Eimreiðinni 1966: „Þá efndi Þjóðleikhúsið til sýningar á barnaleikriti eftir hina afkastamiklu skáldkonu Ingibjörgu Jónsdóttur, „Ferðin til Limbó", með tónlist eftir aðra Ingibjörgu — Þorbergs. Börnin virtust skemmta sér prýðilega, en ekki var þar mikill skáldskapur á ferðinni og bætti hvorug Ingibjörgin við hæð sína þar. Undarlegt tiltæki annars að fara að kenna barnaleikrit við forgarð Helvítis í Guðdómlegasjónarspilinu eftir Dante, nærri óafsakanleg fátækt í landi þjóðsagna og ævintýra að þurfa að fá aðalpersónurnar að láni hjá Walt Disney. En látum svo vera - börnin skemmtu sér og til þess var leikurinn gerður.“

 

Á.Hj.  hittir kannski naglann á höfuðið í Morgunblaðinu, 12. janúar 1966: „Þó að harðfullorðnum áhorfanda eins og mér hljóti að finnast fátt um ýmislegt í þessum leik, skiptir það litlu máli; börnin voru auðsæilega glöð og ánægð, klöppuðu fyrir hverju atriði og fagnaðarlátunum í lokin ætlaði seint að linna. Þær innilegu viðtökur eru næg sönnun þess að ævintýrið um músabömin eigi þrátt fyrir allt vinsældir og langt líf fyrir höndum.“

 

Furðulegt að sjá að í frétt um leikritið í Mánudagsblaðinu skuli hvorki vera mynd af Ingibjörgu Jónsdóttur né Þorbergs (sem samdi tónlistina), heldur teikning af Bessa Bjarnasyni!

 

Allt um Ingibjörgu Jónsdóttur, rithöfund og þýðanda í skáldatali

 Myndin er héðan

Facebook
Líka við
Please reload

Please reload