Kvikukantatan
Ingibjörg Elsa Björnsdóttir hefur sent frá sér nýja ljóðabók sem ber titilinn Kvikukantatan. Þetta er önnur ljóðabók Ingibjargar en hún hefur einnig sent frá sér tvö smásagnasöfn og þýðingar. Ingibjörg sækir efnivið ljóðanna í ýmsar áttir og yrkir um trúna, náttúruna, ástina og söguna, svo fátt eitt sé nefnt. Tilvísanir til bæði erlendra sem íslenskra bókmennta koma víða fyrir, dæmi um hið síðarnefnda er ljóð sem hefur að geyma öfluga sjálfsmynd og ber titilinn: Ég heiti Ingibjörg og ég er ljón.
Ljóð Ingibjargar spanna vítt tilfinningaróf og augljóst er að hún hefur gott vald á ljóðrænu tungumáli og formi.
Skáld.is óskar Ingibjörgu Elsu til hamingju með nýju bókina sem fjallað verður nánar um síðar.
Í Kvikukantötunni er meðal annars að finna þetta skemmtilega ljóð um ýmislegt sem verður skáldinu innblástur til sköpunar:
Innblástur
Fór í Bókakaffið.
Þar sat skáldagyðjan
að leysa sudoku.
Datt um Pétur Gaut,
grænan og máðan
á kilinum.
Fyrr en varði
lukust upp lendur goðsagna
og skáldskapar.
Ég tók andköf
horfðist í augu
við Milton og Blake
- var í félagsskap
með englum.
Er ég leit upp
var skáldagyðjan
horfin inn í tölvuna
þar sem hún
lagðist yfir fésbókina
eins og bláleit móða
úr myrkum eldum
í Vatnajökli.