Hinsegin verðlaunaljóð

 

 

 

Í gær var tilkynnt á Hýrum húslestrum í Tjarnarbíói hvaða skáld hrepptu verðlaunin í Ljóðasamkeppni Hinsegin daga. 56 ljóð bárust keppninni en í dómnefnd sátu Ásta Kristín Benediktsdóttir, Harpa Rún Kristjánsdóttir og Viðar Eggertsson. Verðlaunin komu í hlut þriggja kvenna: Fyrstu verðlaun fékk Anna Gyða Sigurgísladóttir fyrir ljóð sitt Tartufo nero, önnur verðlaun komu í hlut Brynhildar Yrsu Valkyrju fyrir ljóðið Sláturfélag Suðurlands og þriðju verðlaun hlaut Þórdís Gísladóttir fyrir ljóðið Við Faxaflóa. Þórdís gaf Skáld.is góðfúslegt leyfi til þess að birta verðlaunaljóðið hennar:

 

 

Við Faxaflóa

 

Útsýnið til sjávar
verður óhindrað
þar sem ég geymi þig
í einangrun
en góðu yfirlæti
með snjallsíma,
værðarvoð
og leyfi til að reykja undir eldhúsviftunni.

Fjallasýn mun gleðja,
ofbirtu stafa af geislandi hafi
á góðum dögum.
Þú liggur í rúmi
með hníf, skæri og sporjárn undir koddanum,
í von um að dreyma lausnmiðaða drauma.
Þú bíður eftir að ég komi
úr sundi,
bakaríi,
eða frá tannlækni,
færi þér melatónín og rauðvín,
segi gamansögur,
lýsi líkamlegri hrörnun,
baktali sukkbremsur,
fólk sem hefur metnað fyrir konseptum
og notar illa valin orð.
Andardrættir okkar örari en eðlilegt getur talist,
í nýlegu húsi
þar sem aldrei hefur verið framið morð,
bjóðum við hvor annarri
bólgueyðandi samtalsmeðferð,
strjúkum örin á líkömum okkar
með umferðargný
sem undirleik
og flýtum hægt fyrir okkur
þar sem útsýnið til sjávar er óhindrað.

 

  

Facebook
Líka við
Please reload

Please reload

Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband