• Steinunn Inga Óttarsdóttir

Siðspillt tröllskessa, uppfull af skömm

Eva Rún Snorradóttir er maístjarnan 2019. Hún ólst upp í Breiðholtinu. Eftirfarandi ljóð birtist á facebooksíðu Reykjavíkur bókmenntaborgar, 8. ágúst 2014 og er of gott til að birta það ekki að minnsta kosti árlega:

Fjallahneigð

Prúð, stillt, mjúk og góð

ólst ég upp, umvafin blokkum

sem földu ykkur

vandlega, kyrfilega.

Það var ekki talað um ykkur

nema í fornum sögum.

Menn fóru upp á ykkur.

Konur úr öðrum víddum

ráfuðu um ykkur

í litríkum kjólum,

þreifandi á grösugum

lendunum.

Grjót rennur niður

mjúkar hlíðar ykkar.

Vindar leika

um sællega toppana.

Rakir moldarhólar

bíða snertingar.

Og ég,

siðspillt tröllskessa

uppfull af skömm,

lít undan

lokkandi ásjón ykkar

á ferðum mínum um þjóðveginn,

læt á engu bera.

Mynd af Evu Rún: benedikt.is