Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Fyrsta ljóðabók Hildar Eirar Bolladóttur

Ljóðabókin Líkn kom út nú á dögunum en það er fyrsta ljóðabók Hildar Eirar Bolladóttur. Þetta er önnur bók Hildar Eirar en árið 2016 sendi hún frá sér bókina Hugrekki - sögu af kvíða sem hlaut lofsamlega dóma og var tilnefnd til Fjöruverðlauna. 

 

Að sögn Hildar Eirar fjallar ljóðabókin Líkn öðru fremur um dauðann og hvernig við mætum honum með tilfinningum okkar og atferli. Sum ljóðin eru reyndar gamlar æskumyndir sem hafa fylgt henni alla tíð og svo sterkt að hún getur enn fundið lykt og bragð af deginum eða stundinni sem þær áttu sér stað. Hildur Eir segir að þau ljóð skrifuðu sig nánast sjálf, þau séu eiginlega bara eins og gamlar ljósmyndir í nokkrum orðum.

 

Hildur Eir segir einnig svo frá að þar sem hún hafi alist upp á kirkjustað og faðir hennar var prestur hafi dauðinn verið henni nálægur frá fyrstu minningu. Henni hafi fundist svo forvitnilegt að fylgjast með atferli fólks í kringum dauðann og öllum þeim siðum og hefðum sem skapast í kringum hann en líka öllum vandræðaganginum og hátíðleikanum sem verður til vegna þess að okkur finnst óþægilegt að lifa í sátt við dauðann jafnvel þótt hann sé það eina sem ekkert okkar getur flúið. Ljóðin eru þess vegna bæði kómísk en líka hughraust af því að í gegnum starf hennar sem prestur hafi hún lært að umgangast dauðann af fumleysi en líka auðvitað djúpri alvöru.

 

 

Hér má lesa eitt ljóðanna úr ljóðabókinni Líkn:

 

 

Yfir steinhlaðinn vegg
berst þögnin,
saga
þjáningar
dauða
og upprisu.
Í þessum garði
fá allir
merkta gröf
klædda greni
og furu,
gæfumenn
og ógæfumenn
hvíla í móðurskauti
moldar

 

 

Facebook
Líka við
Please reload

Please reload