Ljóð dagsins eru tvö að þessu sinni og eru fengin úr ljóðabókinni Ströndum eftir Önnu S. Björnsdóttur sem kom út árið 1990. Ljóðin eiga það sammerkt að vera gáskafull; kalla fram bros og kitla hláturtaugarnar. 

Bros

Dagarnir hlaupa

frá mér

eins og 

litlir óþekkir krakkar.

Minning þeirra

skilur eftir

bros 

á vörum mínum. 

Hrútaljóð

Og svo hafið þig 

hrútana hérna

sagði hún hressilega

mitt í sauðburðinum

og benti á kind

með horn

eða þekkir maður ekki

hrútana á hornunum?

Nei, þeir þekkjast aðallega

á klofinu

var svarið.

Ekkert meira 

með það.

Myndin af Önnu er fengin af vefsíðunni berlinsoup.org