Jóna Guðbjörg Torfadóttir∙ 5. maí 2019
Ódauðleg brjóst - Ásdís Ingólfsdóttir
Ljóð dagsins er Ódauðleg brjóst sem birtist í samnefndri ljóðabók eftir Ásdísi Ingólfsdóttur. Ljóðabókin kom út í fyrra og var tilnefnd á dögunum til Maístjörnunnar. Ljóðið er einnig að finna í nýútkomnu úrvalssafni Meðgönguljóða.
Ódauðleg brjóst
Fyrir daga silíkonsins
dillaði þetta dásamlega dúó í steríó
varð svo mónó
eins og fermingargræjur systur minnar
sem dóu drottni sínum
með The Monkees
nú hlusta ég
á saltvatnið gjálfra í silíkonpúðunum
hugsa um hversu erfitt
verður að þrífa
líkbrennsluofninn
eftir að þessi tvö skjótast um
eins og poppkorn
í hitanum