Soffía Auður Birgisdóttir∙15. febrúar 2019
Nýtt ljóð ort í tilefni frétta af bláum tönnum og horfnum konum
Sigrún Björndóttir skáld orti ljóð í tilefni frétta af bláum tönnum og horfnum konum og birtum við það hér á Skáld.is sem er einmitt vefur helgaður konum sem skrifa. Nánari upplýsingar um Sigrúnu má finna í Skáldatalinu.
Lapis lazuli
hugsa til þín systir
með hafið í penslinum
rándýrt himnarykið
heiðríkjuna sjálfa
hugsa um tungu þína
væta helgasta litinn
heitar varir
hvessa drættina
þú myndlýstir handrit
öðrum betur
munstraðir skinnið
fínbláum línum
hugsa um strit þitt
mulinn stein, Maríuklæði
hafblik í tönnum þínum
þúsund árum síðar
Sigrún Björnsdóttir