Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Frumbirting á verðlaunaljóði eftir Margréti Lóu

 

Ljóðstafur Jóns úr Vör var veittur í sautjánda skiptið þann 21. janúar síðastliðinn. Að þessu sinni bárust 302 ljóð í keppnina. Annað sæti kom í hlut Margrétar Lóu Jónsdóttur fyrir ljóðið Allt sem lifir deyr. Margréti Lóu þarf vart að kynna því hún er löngu orðin að góðu kunn fyrir ljóðagerð sína en hún hefur sent frá sér fjölda verka allt frá árinu 1985, sjá Skáldatal. Skáld.is fékk góðfúslegt leyfi skáldkonunnar til að frumbirta þetta glæsilega verðlaunaljóð og óskar henni innilega til hamingju:

 

 

 

 

 

ALLT SEM LIFIR DEYR

 

tregasöngur gufu sem stígur upp úr hver

meðan sólin þrýstir glóandi tungubroddi ofan í gjótu

við dönsum kringum sjálf okkur einsog skýhnoðrar í golu  

holdi klæddur ófullkomleiki undir margföldu lagi af umbúðum

   allt sem lifir deyr

hlátur sem gefur til kynna að bernskudraumur sé í þann veginn að rætast

grátur sem kemur upp um óslökkvandi þrá eftir samúð 

   þögnin sér um að ramma inn myndir af sigrum okkar og ósigrum

mistökum okkar jafnt sem góðverkum – þögnin

hanskaklædd einsog forvörður sem tekist hefur að hreinsa burt

myglu og óhreinindi af ómetanlegu listaverki

   allt sem lifir deyr

samvera sem minnir á krukku fulla af lukkumiðum

borgir sem vaka allan sólarhringinn – rándýr sem njótast (og stundum

langar ekkert okkar heim)          

kirkja sem er í laginu einsog sæljón horfir til vesturs

höggmynd sem er nýbúin að nema land tekur ferðamönnum

fagnandi og á nóttunni syngja vindar í styttugarði hetjuljóð

í dögun mætir okkur garðhlið þar sem trjálauf ærslast í sólskini

líkt og glitrandi perluhengi – skilrúm milli lifenda og dauðra

minningar erfast muldra veggir sem fylgjast með samanfléttuðum líkömum

klukknahljómar smjúga gegnum skráargöt – brjóta sér leið gegnum steinsteypu

rúðugler og timbur á meðan náttmyrkrið gælir við augasteina okkar og tunglið

fylgist með líkt og alsjáandi auga guðs

  – allt sem lifir deyr

 

Facebook
Líka við
Please reload

Please reload