Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Ísland er land þitt - Margrét Jónsdóttir

Ljóð vikunnar er eftir skáldkonuna Margréti Jónsdóttur. Kvæðið hefur fyrir löngu unnið sér sess sem eitt vinsælasta ættjarðarljóð þjóðarinnar og er það oft sungið á mannamótum við lag Magnúsar Þórs Sigmundssonar. Jafnvel líta sumir svo á að Ísland er land þitt sé hinn eiginlegi þjóðsöngur Íslendinga og var meira að segja lögð fram þingsályktunartillaga þar um, árið 2004. 

 

Ljóðið birtist fyrst í þjóðhátíðarblaði Morgunblaðsins 17. júní  árið 1954 og síðan í síðustu ljóðabók Margrétar, Nýjum ljóðum, sem kom út árið 1970.

 

 

 

 
 
 
 
 
 
 
Ísland er land þitt

 

Ísland er land þitt, og ávallt þú geymir
Ísland í huga þér, hvar sem þú ferð.
Ísland er landið sem ungan þig dreymir,
Ísland í vonanna birtu þú sérð,
Ísland í sumarsins algræna skrúði,
Ísland með blikandi norðljósa traf.
Ísland að feðranna afrekum hlúði,
Ísland er foldin, sem lífið þér gaf.

Íslensk er þjóðin sem arfinn þinn geymir
Íslensk er tunga þín skír eins og gull.

Íslensk er sú lind,sem um æðar þér streymir.
Íslensk er vonin, af bjartsýni full.
Íslensk er vornóttin, albjört sem dagur,
Íslensk er lundin með karlmennskuþor.
Íslensk er vísan, hinn íslenski bragur.
Íslensk er trúin á frelsisins vor.

Ísland er land þitt, því aldrei skal gleyma
Íslandi helgar þú krafta og starf
Íslenska þjóð, þér er ætlað að geyma 
íslenska tungu, hinn dýrasta arf.
Ísland sé blessað um aldanna raðir,
íslenska moldin, er lífið þér gaf.
Ísland sé falið þér, eilífi faðir.
Ísland sé frjálst, meðan sól gyllir haf.

 

 

 Hér má hlýða á lagið í flutningi Ragheiðar Gröndal:

 

 

 

 

 

 

 

 

 

 

 

 

 

 

 

Heimildir:

Jónas Ragnarsson. 2002. ,,Ísland er land þitt." Mbl.is, 15. júní. Slóðin er: https://www.mbl.is/greinasafn/grein/673634/

Þingskjal 301/2004-2005. Tillaga til þingsályktunar um nýjan þjóðsöng. Slóðin er: https://www.althingi.is/altext/131/s/0301.html

 

 

Facebook
Líka við
Please reload

Please reload