• Jóna Guðbjörg Torfadóttir

Konur hljóta Barnabókaverðlaun Reykjavíkurborgar

Barnabókaverðlaun Reykjavíkurborgar voru afhent í Höfða í dag. Veitt voru verðlaun fyrir bestu frumsömdu barna- og unglingabókina á íslensku, bestu þýðingu á barna- og unglingabók og bestu myndskreytingu á barna- og unglingabók.

Öll verðlaunin komu í hlut kvenna: Kristín Helga Gunnarsdóttir var verðlaunuð fyrir bók sína Vertu ósýnilegur: flóttasaga Ishmaels, Magnea J. Matthíasdóttir fyrir þýðingu sína á Kvöldsögur fyrir uppreisnargjarnar stelpur og Rán Flygenring fyrir myndskreytingar í bókinni Fuglar.

Dómnefnd var skipuð Brynhildi Björnsdóttur, formanni, Jónu Björgu Sætran borgarfulltrúa, Gunnari Birni Melsted grunnskólakennara, Davíð Stefánssyni, fulltrúa Rithöfundasambands Íslands, og Þórdísi Aðalsteinsdóttur, fulltrúa Sambands íslenskra myndlistarmanna.