• Guðrún Steinþórsdóttir

Ég dreg mörkin

Ljóð vikunnar er „Ég dreg mörkin“ eftir Kristínu Svövu Tómasdóttur. Ljóðið birtist í þriðju ljóðabók skáldkonunnar; Stormviðvörun sem kom út árið 2015.


Kristín Svava er sagnfræðingur en hún hefur bæði sent frá sér ljóðabækur og fræðirit. Í fyrra fékk hún Fjöruverðlaunin í flokki fagurbókmennta fyrir ljóðabókina Hetjusögur og var einnig verðlaunuð í flokki fræðibóka og almenns eðlis ásamt Erlu Huldu Halldórsdóttur, Ragnheiði Kristjánsdóttur og Þorgerði H. Þorvaldsdóttur fyrir Konur sem kjósa.


Ég dreg mörkin


Ég dreg mörkin við ofbeldi


ég dreg mörkin

við eignaspjöll


ég dreg mörkin

við fimm þúsund krónur


ég dreg mörkin

við milljón


ég dreg mörkin

við billjón


ég dreg mörkin

við foreldralaus partí


ég dreg mörkin

við Pólland


ég dreg mörkin

við sjósund


ég dreg mörkin

við þriðja betlarann


ég dreg mörkin

við slæður


ég dreg mörkin

við geitur


ég dreg mörkin

við bletti í lakinu


ég dreg mörkin

við drenginn með tárið


ég dreg mörkin

við 2004


ég dreg mörkin

við stólpípur


ég dreg mörkin

við sílikon


ég dreg mörkin

við súran hval


ég dreg mörkin

við dagdrykkju

við reykingar á meðgöngu

við það sem ógnað getur lýðheilsu


ég dreg mörkin

við Kana sem er hérna yfir helgi til að steggja vin sinn


ég dreg mörkin

þar sem mörkin hljóta að liggja


ég dreg mörkin

í hringi og slaufur


ég dreg mörkin


hér eru mörkin


ég dreg mörkin