Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Torfhildur Þorsteinsdóttir Hólm fæddist árið 1845 á Kálfafellsstað í Suðursveit. Móðir hennar var Guðríður Torfadóttir og faðir Þorsteinn Einarsson prestur. Torfhildur flutti 17 ára til Reykjavíkur og fékk þar kennslu í tungumálum, hannyrðum og teikningu. Árið 1866 sigldi hún til Kaupmannahafnar til frekara náms í tungumálum og hannyrðum. Þegar Torfhildur sneri aftur heim starfaði hún um stund sem einkakennari en fluttist síðan aftur í Suðursveit. 1872 flutti hún ásamt systur og mági á Skagaströnd. Þar kynntist hún Jakobi Hólm sem hún giftist árið 1874. Hjónabandið varði þó stutt því ári síðar lést Jakob og var Torfhildur einhleyp og barnlaus eftir það. Rúmlega þrítug flutti Torfhildur vestan hafs og bjó þar í þrettán ár. Í vesturheimi sinnti hún einkum ritstörfum og skrásetti þjóðsögur og sagnir sem hún safnaði meðal íslensku landnemanna.

 

Torfhildur varð fyrsti Íslendingurinn til þess að gerast atvinnurithöfundur. Hún var fyrst kvenna til að hljóta styrk frá alþingi. Hún hlaut hann fyrst árið 1891 og var hann þá að upphæð 500 krónur. Hins vegar voru ekki allir sáttir við að kona fengi skáldastyrk og var hann því lækkaður í 200 krónur og kallaður ekknastyrkur. Torfhildur var einnig fyrsti íslenski rithöfundurinn til að skrifa sögulegar skáldsögur. Þá varð hún einnig fyrst íslenskra kvenna til þess að gefa út og ritstýra tímariti. Hún gaf úr ársritið Draupni árin 1891-1908, ársritið Tíbrá sem var ætlað börnum árin 1892-1893 og mánaðarritið Dvöl gaf hún út á árunum 1901-1917.

 

Torfhildur Hólm bjó á Ingólfsstræti 18 síðustu árin og lést árið 1918 úr spænsku veikinni.

 

Heimildir og frekara lesefni:

  • Soffía Auður Birgisdóttir. 2007. „Hver var Torfhildur Hólm?“ TMM. Sjá hér.
  • Silja Aðalsteinsdóttir. 2003. „Torfhildur Þorsteinsdóttir Hólm.“ Bók af bók. Bókmenntasaga og sýnisbók frá 1550-1918, bls. 289. Mál og menning, Reykjavík.
  • Myndin af Torfhildi er sótt á vefsíðuna Manitoba Historical Society, sjá hér.
     

Á vef Netútgáfunnar Snerpu má nálgast sögu Torfhildar um Brynjólf biskup Sveinsson

Torfhildur Þorsteinsdóttir Hólm

    • 1950 Jón biskup Arason
    • 1889 Barnasögur
    • 1889 Elding
    • 1889 Högni og Ingibjörg
    • 1886 Kjartan og Guðrún
    • 1886 Smásögur handa börnum og unglingum
    • 1884 Sögur og ævintýri
    • 1882 Brynjólfur Sveinsson biskup: Skáldsaga frá 17. öld