Steinunn Dagmar

Steinunn Dagmar er fædd og uppalin á Reyðarfirði. Hún er þrjóskt og spaugsamt aldamótabarn sem horfir á heiminn með opnum hug. Hún hefur gaman að list í ýmsu formi, allt frá teikningum til bollastella. Steinunn hefur mikla ástríðu fyrir pennum, er plöntuvinur og skipulagsperri. Einnig hefur hún gaman að því að leika sér með tungumálið og velta fyrir sér spurningum eins og: „Hvert förum við þegar við deyjum?“

 

Steinunn Dagmar hefur gefið út eina ljóðabók, Hugarheimur skúffuskálds, (2019), sú er sjálfútgefin og er skipt upp í sex kafla sem einkennast af litum. Í hverjum kafla er ákveðið þema sem hvergi er útskýrt fyrir lesandanum svo hver og einn getur búið sér til hugmynd um það hvað býr í raun að baki litaskiptingarinnar. 

 

Hér má sjá tvö ljóð úr bókinni: 

 

 

Í garðinum heima

Með kórónu úr fíflum
og heimaræktuð hindber í hönd
virti ég fyrir mér ríkidæmið

Með vöfflur í hárinu
og ósvikið bros á vör
sveiflaðist ég í trénu

Með heiminn í hendi mér
og hamingjuna í fararbroddi
tók ég stefnuna á tunglið

 

 

Strákapör

 

„Hann er bara skotinn í þér“
var sagt við stelpuna
þegar strákurinn hrinti henni

„Hann elskar mig bara svo mikið“
sagði konan við sjálfa sig
þegar maðurinn reif í hár hennar
af einskærri ást

mar
beinbrot

sprungin vör

„Æ þetta eru nú bara strákapör“

 

Steinunn Dagmar

    • 2019 Hugarheimur skúffuskálds

Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband