Senda inn efni

Vefurinn skáld.is er tileinkaður konum og skáldskap þeirra. Hér birtast viðburðir, fréttir, greinaskrif og fagurfræðilegir textar auk gagnabanka um íslenskar skáldkonur.

Ef þú lumar á efni um skáldkonu sem þú vilt koma á framfæri geturðu sent það inn með því að smella á hnappinn hér að neðan eða á netfangið: skald@skald.is

  • Black Facebook Icon
  • Black Twitter Icon
  • Black Instagram Icon

©2017 Skáld.is  |  ​Skáldaskinna ehf |   Ísland  |  skald@skald.is

Hafðu  samband

Margrét Jónsdóttir er fædd 20. ágúst 1893 að Árbæ í Holtum, Rangárvallasýslu. Hún var dóttir einstæðrar móður sem þá var ráðskona hjá Páli Briem sýslumanni. Móðir hennar hafði þrátt fyrir frátækt gengið í kvennaskólann hjá Elínu Briem á Ytri-Ey. Ólst Margrét upp með móður sinni á ýmsum bæjum í Rangárvalla- og Árnessýslu. Árið 1913 fluttust þær til Reykjavíkur og bjuggu saman þar til móðirin lést árið 1956. Árið 1959 giftist Margrét Magnúsi Péturssyni, kennara frá Akureyri.

 

Margrét gekk í Kvennaskólann í Reykjavík 1910-1912 og hóf síðan heimiliskennslu í Borgarfirði og Gullbringusýslu. Einnig stundaði hún verslunar- og skrifstofustörf. Árið 1923 fór hún til frekari menntunar til Danmerkur, sótti þar kennaranámskeið og vann við saumaskap. Þá var hún einn vetur í Björgvin í Noregi. Heim komin settist hún í Kennaraskóla Íslands og lauk þaðan kennaraprófi árið 1926. Sama haust varð hún kennari við barnaskólann í Reykjavík og síðar við Austurbæjarskólann, en varð að hætta kennslu árið 1944 vegna veikinda. Margrét vann lengi sem gæslukona á Þjóðminjasafninu. Hún starfaði mikið að félagsmálum, m.a. í Góðtemplarareglunni og í Lestarfélagi kvenna Reykjavíkur og var ritstjóri Æskunnar frá 1928-1942. Hún lést í Reykjavík 9. desember 1971.

 

Síðari ár ævi sinnar helgaði Margrét ritstörfum og var mjög mikilvirk á því sviði. Hún skrifaði fjölda greina í blöð og tímarit, en flestar bækur hennar, sögur, ljóð og leikrit, eru samdar fyrir börn, einkum stúlkur. Fyrsta bók Margrétar er ljóðabókin Við fjöll og sæ sem kom út árið 1933, en alls gaf hún út sex ljóðabækur fyrir fullorðna. Þekktasta ljóð hennar er „Ísland er land þitt“ við vinsælt lag eftir Magnús Þór Sigmundsson.

 

Textinn er tekinn orðréttur frá Helgu Kress:

Helga Kress. 2001. „Margrét Jónsdóttir 1893-1971“, bls. 235. Stúlka. Ljóð eftir íslenskar konur.  Bókmenntafræðistofnun Háskóla Íslands, Reykjavík.

Margrét Jónsdóttir

    • 1970 Ný ljóð
    • 1968 Sögur úr sveit og borg og leikþættir
    • 1964 Í vökulok
    • 1961 Á léttum vængjum
    • 1959 Geira glókollur í Reykjavík
    • 1957 Geira glókollur
    • 1956 Góðir gestir
    • 1955 Todda í tveimur löndum
    • 1954 Todda kveður Ísland
    • 1953 Todda í Sunnuhlíð
    • 1953 Meðan dagur er
    • 1952 Ljóð við 10 sönglög eftir J. S. Bach
    • 1951 Todda frá Blágarði
    • 1951 Ljósið í glugganum
    • 1943 Vorið kemur
    • 1942 Góðir vinir
    • 1940 Laufvindar blása
    • 1933 Við fjöll og sæ

     

    Þýðingar

    • 1974 Siggi og Logi saga í ljóðum gerð eftir erlendri fyrirmynd
    • 1949 Oft er kátt í koti: tólf smáleikrit fyrir börn
    • 1934 Árni og Erna e. Marie Henckel
    • 1934 Silfurturninn og Ólíkir drengir
    • 1933 Galdrakarlinn góði
    • 1931 Karen e. Helen Hempel